’லீடர்’ திரைப்பட விமர்சனம் 3.5/5
தூத்துக்குடியைச் சேர்ந்த கார் மெக்கானிக்கான நாயகன் லெஜண்ட் சரவணன், தனது மகளுடன் வாழ்ந்து வருகிறார். தாய் இல்லாத தன் மகள் மீது அளவுக்கடந்த பாசம் வைத்திருப்பவர், மகளுக்காக எதையும் செய்யும் துணிச்சல் மிக்கவர்.
தூத்துக்குடி துறைமுகத்தை தன் கட்டுப்பாட்டில் வைத்திருக்கும் வில்லன் பாகுபலி பிரபாகரன், மூலம் நடக்க இருக்கும் நாசவேலையை தடுக்க போலீஸ் இன்ஸ்பெக்டர் ஆண்ட்ரியா முயற்சிக்கிறார். அது முடியாமல் போக, துறைமுகத்திற்குள் அடிக்கடி சென்று வரும் லெஜண்ட் சரவணனை வைத்து அந்த வேலையை செய்ய முடிவு செய்கிறார். அதன்படி, அவரது மகளை வைத்து ஆண்ட்ரியா போடும் திட்டத்தால் லெஜண்ட் சரவணன், பிரபாகரனின் கடத்தல் பொருளை போலீஸிடம் சிக்க வைப்பதோடு, அவரது சாம்ராஜ்யத்தையே அழிக்கும் வேலைகளில் ஈடுபடுகிறார்.
அதற்கு ஏற்றவாறு லெஜெண்ட் சரவணனின் மகளை கடத்தி வந்து ஒளித்து வைத்துவிட்டு, அவளை பாகுபலி பிரபாகர்தான் கடத்தி இருக்கிறார் என்ற ஒரு பொய்யை சொல்லி லெஜெண்ட் சரவணனை தூண்டிவிட்டு அந்த கண்டெய்னரை வெளியில் எடுக்க வைக்கிறார் ஆண்ட்ரியா. இன்னொரு பக்கம் ஷாம் கடத்தலுக்கு உள்ளாகும் அந்த கண்டெய்னரை மீட்க பெரும் முயற்சி செய்கிறார். சாதாராண கார் மெக்கானிக்கான லெஜண்ட் சரவணனின் அதிரடி நடவடிக்கையால் சந்தேகம் அடையும் காவல்துறை உயர் அதிகாரியான ஷாம், அவரைப் பற்றி மேற்கொள்ளும் ரகசிய விசாரணையில், திட்டமிட்டு காவல்துறையை பயன்படுத்தி பாகுபலி பிரபாகரனை லெஜண்ட் சரவணன் அழித்திருப்பதை அறிந்துக் கொள்கிறார். இதையடுத்து ஷாம், மேற்கொள்ளும் தொடர் விசாரணையில் லெஜண்ட் சரவணன் பற்றிய பல உண்மைகள் தெரிய வருகிறது. அப்படியென்றால் லெஜண்ட் சரவணன் யார்? அவருக்கும் கடத்த்ல் கும்பலுக்கும் என்ன சம்பந்தம்? என்பதை அதிரடி, அமர்க்களமான ஆக்ஷன் காட்சிகளுடன் வெளி வந்திருக்கும் படம்தான் “லீடர்”.
நாயகனாக நடித்திருக்கும் லெஜண்ட் சரவணன், இரண்டாவது படத்திலேயே அதிரடி ஆக்ஷன் ஹீரோவாக உருவெடுத்து ஆச்சரியப்படுத்தியிருக்கிறார். சாதுவாக அறிமுகமாகி தனது ஒவ்வொரு அதிரடியான செயல்கள் மற்றும் சண்டைக்காட்சிகள் மூலம் திரைக்கதைக்கு பெரும் பலம் சேர்த்திருப்பவர், தோற்றம் மற்றும் உடல் மொழியில் அக்மார்க் ஆக்ஷன் ஹீரோவாக பளிச்சிடுகிறார். மகளின் பாசத்திற்காக ஏங்கும் காட்சிகளில் முதிர்ச்சியான நடிப்பை வெளிப்படுத்தியிருப்பவர், தற்போதைய கோலிவுட் மாஸ் ஹீரோக்களே மிரளும் வகையில், தன் கதாபாத்திரத்தை கச்சிதமாக கையாண்டு கைதட்டல் பெறுகிறார்.
நாயகியாக நடித்திருக்கும் பாயல் ராஜ்புத்துக்கு பெரிய வேலை இல்லை என்றாலும், திரைக்கதையின் திருப்பத்திற்கு முக்கிய பங்கு வகித்திருக்கிறார்.
போலீஸ் இன்ஸ்பெக்டராக நடித்திருக்கும் ஆண்ட்ரியா ஜெர்மையா, போலீஸ் உயர் அதிகாரியாக நடித்திருக்கும் ஷாம், வில்லனாக நடித்திருக்கும் சந்தோஷ் பிரதாப் ஆகியோர் கொடுத்த வேலையை குறையின்றி செய்திருப்பதோடு, அவர்களது திரை இருப்பு படத்திற்கு மிகப்பெரிய அடையாளத்தை கொடுத்திருக்கிறது.
பாகுபலி பிரபாகரன், லால், விடிவி கணேஷ், அமிர்தா ஐயர், சிறுமி இயல் என மற்ற கதாபாத்திரங்களில் நடித்திருக்கும் அனைத்து நட்சத்திரங்களும் திரைக்கதை ஓட்டத்திற்கு பலம் சேர்க்கும் வகையில் பயணித்திருக்கிறார்கள்.
ஒளிப்பதிவாளர் வெங்கடேஷ்.எஸ், ஹீரோவையும், அவரது சண்டைக்காட்சிகளையும் படமாக்கிய விதம் ரசிக்க கூடிய விதத்தில் இருக்கிறது. காட்சிகளின் தரத்தால் படத்தின் செலவுகளை திரையில் பிரமாண்டமாக தெரிய வைத்திருக்கிறார்.
ஜிப்ரான் இசையில் பாடல்கள் அனைத்தும் இனிமையாக இருக்கிறது. பின்னணி இசை திரைக்கதையின் வேகத்திற்கு ஈடுகொடுக்கும் விதத்தில் பயணித்திருப்பதோடு, அதிகப்படியான ஆக்ஷன் காட்சிகள் இருந்தாலும், அனைத்தையும் ரசிக்கும்படி அளவான சத்தத்தோடு கையாண்டு படத்திற்கு பலம் சேர்த்திருக்கிறது.
ஆக்ஷன் படமாக இருந்தாலும், அப்பா – மகள் செண்டிமெண்ட் மூலம் அனைத்து தரப்பினரும் பார்க்கும் படமாக கொடுத்திருக்கும் இயக்குநர் ஆர்.எஸ்.துரை செந்தில், தூத்துக்குடியில் ஆரம்பிக்கும் கதையை, இந்தியாவை கடந்து, சர்வதேச அளவில் விவரித்த விதம் பார்வையாளர்களின் கவனம் சிதறாமல் படத்துடன் பயணிக்க வைக்கிறது.
லெஜன் சரவணனை ஆக்ஷன் ஹீரோவாக காட்டுவதோடு, அதை மக்கள் ஏற்றுக்கொள்ளும்படியாக காட்சிகளை மிக சிறப்பாக வடிவமைத்திருக்கும் இயக்குநர் ஆர்.எஸ்.துரை செந்தில், இறுதிவரை திருப்பங்கள் இருக்க வேண்டும் என்பதற்காக, கிளைமாக்ஸ் நெருக்கத்தில் வைத்த சில காட்சிகள் ஆச்சரியப்பட வைத்தாலும் ஏற்றுக்கொள்ளும்படி இல்லை. இருந்தாலும் அது குறையாக அல்லாமல் திரைக்கதையின் வேகம் மற்றும் விறுவிறுப்புக்கு துணையாக நின்று படத்தை கொண்டாட வைத்திருக்கிறது.
மொத்தத்தில், ‘லீடர்’ வெற்றிக்கு தகுதியானவர்.
