சென்னையில் தினமும் 30 ஆயிரம் திருப்பதி லட்டுகள் விற்பனை செய்ய ஏற்பாடு!
வைகுண்ட ஏகாதசியையொட்டி திருப்பதி ஏழுமலையான் கோவிலில் ஜனவரி 13-ந் தேதி சொர்க்கவாசல் திறக்கப்படுகிறது. தொடர்ந்து 10 நாட்கள் சொர்க்கவாசல் வழியாக பக்தர்கள் செல்ல ஏற்பாடு செய்யப்பட்டுள்ளது.
இதுகுறித்து திருப்பதி தேவஸ்தான செயல் அதிகாரி தர்மா ரெட்டி தலைமையில் ஆலோசனை கூட்டம் நடந்தது. இதைத் தொடர்ந்து அவர் நிருபர்களிடம் கூறியதாவது:-
வருகிற 1-ந் தேதி ஆங்கிலப் புத்தாண்டு, 13-ந் தேதி வைகுண்ட ஏகாதசி கொண்டாடப்படுகிறது. 13-ந் தேதி முதல் 22-ந் தேதி வரை 10 நாட்கள் சொர்க்க வாசல் தரிசனத்துக்காக பக்தர்கள் அனுமதிக்கப்படுகின்றனர்.
13-ந் தேதி நள்ளிரவு 12 மணி முதல் அதிகாலை 2 மணி வரை திருப்பாவை பாமாலை, அர்ச்சனை, நெய்வேத்தியம் சமர்பித்து பூஜைகள் நடைபெறும். 2 மணிக்கு சொர்க்க வாசல் திறக்கப்பட்டு முக்கிய பிரமுகர்கள் தரிசனத்துக்கு அனுமதிக்கப்பட உள்ளனர்.
ரூ.300 சிறப்பு தரிசன டிக்கெட், இலவச தரிசனம், கல்யாண உற்சவம், ஆர்ஜித பிரமோற்சவம், சகஸ்கர தீப அலங்கார சேவை டிக்கெட் ஆன்லைனில் பெற்றவர்கள் காலை 9 மணி முதல் ஒதுக்கப்பட்ட நேரத்தில் தரிசனத்துக்கு அனுமதிக்கப்பட உள்ளனர்.
நாள்தோறும் 45 ஆயிரம் பக்தர்கள் தரிசனத்துக்கு அனுமதிக்க ஏற்பாடு செய்யப்பட்டுள்ளது.
திருப்பதி உள்ளூர் பக்தர்களுக்காக தினமும் 5 ஆயிரம் டிக்கெட்கள் வீதம் 10 நாட்கள் 50 ஆயிரம் டிக்கெட் வழங்க ஏற்பாடு செய்யப்பட்டுள்ளது. இதற்காக 5 கவுண்டர்கள் திறக்கப்படுகிறது.
புத்தாண்டு மற்றும் வைகுண்ட ஏகாதசியை ஒட்டி பல்வேறு ஊர்களில் உள்ள திருப்பதி தேவஸ்தான தகவல் மையத்தில் லட்டுகள் விற்பனை செய்ய ஏற்பாடு செய்யப்பட்டுள்ளது.
சென்னையில் நாள்தோறும் 30 ஆயிரம் லட்டுகள், கல்யாண உற்சவ லட்டுகள் 500-ம், வேலூரில் 5 ஆயிரம் லட்டுகளும், பெங்களூரில் 10 ஆயிரம் லட்டுகளும், ஐதராபாத், விசாகப்பட்டினத்திலும் லட்டுகள் விற்பனை செய்ய ஏற்பாடு செய்யப்பட்டுள்ளது.